L. CANCELA
Amigos e amigas, chegou o momento do verán! Nunca mellor dito, porque hoxe, a dous minutos das cinco da tarde, darase por comezada a estación. Vaia curso que pasamos! Seguro que foi un ano especial, cheo de novas experiencias e aprendizaxes. Espero que todos pasedes de curso e, a quen vos cadre, cambiedes de etapa. Pero agora non é momento de pensar no futuro. Xa chegarán os novos libros en setembro para que o fagades. As despedidas de clase sempre soan a final e fan que esteamos un pouco nostálxicos; iso si, mágoas fora! Hoxe é un día de celebración e de mirar para atrás para ver todo o que levamos connosco.
Manter o interese
Se abrides o xornal estas semanas, podedes ler noticias relacionadas co primeiro tema do curso: o xuízo do accidente do Alvia, a peor catástrofe ferroviaria de Galicia. Dende aquela, analizamos informacións moi diversas, algunhas incluso con capacidade de facernos rir e aprender cousas curiosas, como a posible orixe galega de Cristovo Colón ou todo o ritual que hai que seguir para elixir ao papa do Vaticano.
Aínda que sexa verán, non esquezades as tarefas para manter ben fresco todo o que estudastes. Xuño e xullo serán atarefados, polo menos, no que á actualidade se refire. O 23 do próximo mes son as eleccións xerais, nas que os españois maiores de 18 años elixirán os seus representantes. Lembra o que falamos hai unhas semanas: destes comicios sairán as persoas que farán as leis do noso día a día. Se entre praia e praia vos aburrides, xa tedes un plan: do 20 de xullo ao 20 de agosto celébrase a Copa Mundial Feminina de Fútbol. Apoiar este deporte é moi importante, pois existen grandes diferenzas co masculino en canto a salario e condicións de traballo. Como vimos, a mellor futbolista cobra cen veces menos que o mellor xogador masculino.
Se ides de vacacións, apostade por un turismo sostible, como falamos hai unha semana. Intentade non viaxar con estereotipos. Tratamos deste tema a raíz da película As bestas, lembrades? Para coñecer ben unha cultura, é esencial non visitar un sitio cunha mala idea do que ides atopar. Por exemplo, non vaiades a Cataluña pensando que son uns rañados.
A información internacional
A invasión de Rusia a Ucraína segue facendo tremer ao mundo. O presidente de Ucraína, Volodímir Zelenski, segue pedindo axuda ao resto dos países occidentais, entre os que está España. Precisamente, o noso país toma a presidencia do Consello da Unión Europea dentro de dúas semanas, e o conflito bélico terá que formar parte dalgunhas das decisións que todos os membros da Unión tomen. Un compromiso que se organiza en tríos: primeiro vai España, logo Bélxica e, finalmente, Hungría. Un conxunto que, por certo, tamén terá como obxectivo a transformación dixital. É dicir, pasar dos métodos de traballo manuais aos dixitais. O certo é que o avance tecnolóxico está medrando a pasos axigantados. De feito, Galicia será un polo da intelixencia artificial, coa instalación da Axencia Española de Supervisión da Intelixencia Artificial na Coruña. Este organismo encargarase de poñer límites e velar polo usuario ante este tipo de algoritmos. Seremos referentes europeos e o resto dos países aprenderán do noso exemplo.
Nestes tres próximos meses teredes tempo para pasalo ben, pero non deixedes de estar informados do que pasa no mundo e coñecer o contexto das noticias que fan que teñamos un pensamento crítico e as ideas claras. E lembra que ler un xornal é como ter un billete gratis para calquera parte do mundo.
Un curso cheo de profesións: desde avogados a concelleiros ou historiadores
Da man da actualidade informativa, tratamos de temas moi sensibles. Por exemplo, aprendemos que non existe o dereito a ter fillos, debatemos sobre o que se considera politicamente correcto, cuestionámonos se no fútbol aínda hai homofobia e falamos sobre a importancia de saber deixar unha relación e ser deixado. Tamén vos tivestes que poñer na pel de moitas profesións. Fostes avogados comparando comportamentos reprobables que existen na nosa sociedade, matemáticos adiviñando o diñeiro que se debía repartir en cada premiado da lotería de Nadal; tamén fixestes de economistas e elaborastes a vosa propia pensión ou un orzamento para todo o ano. Houbo tempo para convertervos en xeógrafos falando do voso país favorito, xornalistas para coñecer o pasado ou historiadores de cinema para falar sobre as películas do afastado Oeste. Mesmo vos animastes a ser cociñeiros e a pensar que interese poderían ter algunhas especies invasoras na nosa gastronomía.
LA VOZ DE LA ESCUELA, NÚMERO A NÚMERO
19 DE OUTUBRO
Comeza o xuízo do accidente ferroviario de Angrois. A peor catástrofe ferroviaria de Galicia ocorreu non 2013 e deixou 80 mortos.
26 DE OUTUBRO
A dimisión da primeira ministra de Reino Unido. O país levaba cinco en seis anos e atravesaba una crise política, debido ás consecuencias do brexit.
2 DE NOVEMBRO
A Aesia podía converter a Galicia en referente de intelixencia artificial. O organismo estará na Coruña e lexislará moita da tecnoloxía que xa temos nas nosas mans.
9 DE NOVEMBRO
Piqué deixa o fútbol. A súa retirada permitiunos falar das diferenzas do fútbol masculino có feminino e da mala imaxe deste deporte.
16 DE NOVEMBRO
Comeza o mundial de Qatar. Foi un dos torneos máis polémicos, porque o país non respecta os dereitos das mulleres e do colectivo LGTBI. O diñeiro comprou conciencias?
23 DE NOVEMBRO
A lei do «só si é si» ten o efecto contrario. Levou a rebaixa dalgúns condenados por delitos sexuais e nos preguntamos se a lei debe defender a todos.
30 DE NOVEMBRO
España aproba os presupostos. O programa do Goberno sobre o destino do diñeiro saíu adiante. A Unión Europea aportou unha cantidade sen precedentes.
7 DE DECEMBRO
«As bestas» obtén 17 nomeamentos aos premios Goya. O filme, baseado nun crime de Galicia, fora criticado por perpetuar os estereotipos da nosa comunidade.
14 DE DECEMBRO
Unha velutina, nai de todas as avespas asiáticas. Falamos da súa chegada a Europa, así como a forma de introducir outras especies invasoras e os seus efectos.
21 DE DECEMBRO
O Sorteo Extraordinario do Nadal. España celebra una tradición, pero o xogo de azar ten outra cara: a ludopatía.
11 DE XANEIRO
Falece Bieito XVI, o primeiro emérito en 800 anos. Renunciou ao seu cargo con vida, no 2013, un feito que non se repetía desde 1294. Como se elixe ao papa?
18 DE XANEIRO
A canción de Shakira con Bizarrap. A cantante dedícalle a sesión a Piqué, o seu ex, e reabre o debate sobre facer as relacións públicas, saber deixar e ser deixado.
25 DE XANEIRO
Reábrese o debate sobre o aborto. O Goberno de Castela e León anunciou novas medidas provida que non estaban aconselladas polos médicos. Finalmente, tiveron que retiralas.
1 DE FEBREIRO
Europa acorda enviar tanques a Ucraína. O apoio da OTAN non cesa e confirma o noso papel como parte da loxística da guerra.
8 DE FEBREIRO
O ataque de catro cans, tres de raza perigosa, a una muller reabre o debate. Un pobo de Ourense estaba atemorizado por este suceso, pois xa tiveran varios sustos. A educación dos animais é moi importante para o seu benestar e é responsabilidade dos donos.
15 DE FEBREIRO
A terra treme en Turquía e Siria. Dous terremotos provocan unha catástrofe que non se vivía desde había 80 anos. Hai miles de falecidos e feridos. As catástrofes son previsibles? Hai desastres de pobres e de ricos ou todo é cuestión de prevención?
1 DE MARZO
A probable orixe galega de Colón. A ciencia permite reescribir a historia e coñecer máis acerca da vida dos nosos antepasados a través do análise do ADN.
8 DE MARZO
Día Internacional da Muller. Aproveitamos esta data para facer memoria dos cen anos de loita nos que a poboación feminina non parou de conseguir dereitos. Fixemos un breve repaso das figuras que marcan ou marcarán tendencia. Recordaas?
15 DE MARZO
O Goberno introduciu reformas nas pensións dos nosos maiores. O aumento de esperanza de vida, o crecemento do número de pensionistas e a redución de persoas que cotizan cuestionan o futuro da xubilación. Poder durar para sempre?
22 DE MARZO
Captúrase un segundo submarino nas costas galegas empregado para o narcotráfico. A posición estratéxica de Galicia no mapa e a súa tradición de contrabando de tabaco fan que a nosa comunidade sexa unha porta de entrada das drogas en Europa.
29 DE MARZO
Varias cidades europeas, entre elas A Coruña, conmemoran a Picasso no medio século da súa morte. Foi un dos artistas máis importantes da historia da arte e Galicia influíu na súa obra.
12 DE ABRIL
Reábrese o debate da xestación subrogada có caso dunha famosa presentadora. O avance na medicina cuestiona a nosa ética: onde quedan os límites da investigación?
19 DE ABRIL
O conflito da mexilla. Percebeiros e bateeiros seguen inmersos nunha disputa polos acantilados, pois a mexilla e o percebe comparten este espazo. A extracción dun supón un problema para o outro.
26 DE ABRIL
O voo de Starship, o foguete máis potente da historia, quedou frustrado no seu primeiro intento. A nave foi construída para chegar á Lúa e a Marte. As grandes potencias mundiais, así como empresarios millonarios, lánzase a carreira por conquistar, de novo, o espazo.
3 DE MAIO
O cantante Bruce Springsteen conquista Barcelona con 73 anos. O exemplo de The Boss, que así é como se lle coñece, serviunos para coñecer a historia da música e aos cantantes que con máis de 70 anos seguen facendo xiras e enchendo estadios con cada concerto.
10 DE MAIO
O Día das Letras Galegas dedícase a Francisco Fernández del Riego, promotor da festividade. Repasamos o resto de figuras homenaxeadas desde que comezou no 1963 en honor a Rosalía de Castro.
24 DE MAIO
As eleccións municipais en Galicia, e tamén autonómicas na maioría de España estaban á volta da esquina. Estes comicios serven para elixir aos concelleiros que formarán parte do pleno municipal. Algo así como o Parlamento da nosa cidade.
31 DE MAIO
Vinicius planta cara aos insultos racistas por parte duns afeccionados. A sociedade española empeza a preguntarse se España é un país racista. Todos temos un papel na loita contra este tipo de discriminacións.
7 DE XUÑO
A partir do 1 de xullo, España pasa a presidir o Consello da Unión Europea. Aínda que o actual presidente do Goberno en funcións, Pedro Sánchez, convocara eleccións xerais para o 23 do mesmo mes, este cargo mantense para o noso país. A Unión Europea amosa como un pacto económico serviu para crear lazos entre nacións que foran inimigas no pasado.
14 DE XUÑO
Un turismo sostible é posible. O actual ritmo de viaxes que levamos e as infraestruturas creadas para facerlle fronte poden pasar factura ao noso planeta. Por iso, cando viaxemos debemos ser visitantes respectuosos có lugar e os seus habitantes.
