CINTHYA MARTÍNEZ
Pode que o pises moitas veces e nin sequera te deas conta. Sexa na rúa ou no interior dalgúns edificios. Incluso pode que se encontre nalgunha parte do teu fogar. Estouche a falar do granito, unha pedra natural ou rocha ornamental, podes utilizar o termo que prefiras. Estas extráense da natureza en bloques e, tras uns procesos de corte, dimensionado e tratamento, son aptas para utilizarse na construción ou con fins ornamentais.
De maneira xeolóxica, o granito é unha rocha ígnea plutónica formada polo arrefriamento lento dun magma a grandes profundidades da codia terrestre. Está constituída por minerais esenciais como o cuarzo, o feldespato e a mica. E neste senso, é importante recalcar que ningunha das variedades que se extraen no territorio galego se obteñen en ningún outro lugar do mundo.
O que hai naquel solo non é igual que o piso da rúa, poderás pensar. Efectivamente, existen diferentes combinacións de tonalidades propias de cada variedade de granito e tamén un amplo elenco de acabados superficiais e texturas. O acabado superficial que se leva a cabo na fábrica depende dos requisitos do produto en cuestión, pero tamén dos gustos que poida ter o usuario final.
A cor do granito varía segundo a súa composición. Hai que ter en conta a percepción da cor, pero tamén a distancia desde a que se observa. O Clúster do Granito de Galicia enumera cinco gamas cromáticas: amarelos, cremas, grises, ocres e rosas.
O buscador dos granitos
Despois de contarche que Galicia é punteira na produción de granito, e que non hai dúas variedades iguais, é normal que te preguntes como facer para coñecer algunhas (ou todas) destas pezas. E por iso che vou achegar un bo recurso: o Google dos granitos. Non está feito en California nin responde a outras dúbidas que che poidan xurdir que nada teñan que ver con estas pedras naturais (non será porque non che aviso…).
En realidade, este buscador é obra do Centro Tecnolóxico do Granito de Galicia é trátase do primeiro catálogo en liña de todas as variedades de granito que se extraen na comunidade galega. A través do portal web granitosgallegos.piedra.online podedes coñecer as diferentes variedades de granito, as súas características e o seu potencial como elemento de construción. É unha ferramenta moi útil para os profesionais, pero tamén para ti se che apetece descubrir un pouco máis sobre o granito.
O catálogo recompila un total de 41 variedades, con cores e texturas diferentes, que se poden atopar en canteiras de toda Galicia. Entre elas existen algunhas variedades coñecidas, como o rosa Porriño (que ten recoñecemento mundial), o gris Mondariz ou o gris perla. Como podes comprobar, o nome de cada un deles soe estar composto pola cor ou gama cromática do granito e pola súa localización.
Información elaborada en colaboración coa Cámara Mineira de Galicia.
