C. MARTÍNEZ
Úsalo practicamente a diario, xa sexa para estudar ou xa para gozar de tempo de ocio. Para o seu funcionamento, necesítase unha correcta coordinación de elementos. Comezando polo motor que impulsa o disco duro. Este ten imáns feitos dunha aliaxe de ferro, boro e neodimio. O último deles posúe a maior forza magnética xamais medida por imáns permanentes, e por iso os motores fabricados con este elemento son moi potentes para o seu tamaño. Pero hai moito máis.
O boro tamén está presente na electrónica dos portátiles, xunto co arsénico e o silicio. «O primeiro utilízase para os microprocesadores e os revestimentos da pantalla. Entre os seus atributos conta con que pode formar capas sobre o metal, que protexe os dispositivos fronte á corrosión e que proporciona un soporte estrutural e illamento», explica María Maeso, química e técnica en metalurxia na empresa Strategic Minerals.
Onde tamén está presente o silicio é no corpo. «Este é moi coñecido pola súa abundancia na codia terrestre. Utilízase tanto para os procesadores como para os chips. É un metaloide, é dicir, non é un metal como tal, e aí está a clave, xa que é un bo condutor e por iso permite o paso da electricidade», amplía a experta. Para que o entendamos mellor, Maeso engade: «Así como un material illante, como o plástico, non permite a condutividade, o silicio si». No corpo tamén están presentes o aluminio e o ferro, que «recobren as fontes de alimentación das computadoras para proporcionar maior seguridade ao resto dos metais».
As soldaduras son as unións de dúas pezas, sobre todo metálicas. Necesítase aplicar calor para poder unilos. No caso do cobre, este ten como función evitar o quentamento excesivo do procesador e «atópase nas tarxetas e nos cables de conexión. Como dato curioso, o contido de cobre neste tipo de dispositivos supera con creces o de calquera outro metal. Ten unha alta condutividade eléctrica e térmica, que o fai ideal para aguantar». En canto a prata, esta arrefría o procesador, mentres que o estaño «se utiliza para garantir unha boa soldadura e como revestimento protector do cobre, do ferro e doutros metais, xa que é moi maleable».
Na batería está o litio: «É moi bo condutor, pero a cantidade que existe del na natureza é moi limitada. Por iso agora mesmo centrámonos en reciclalo, porque é moi difícil obtelo e illalo», comenta Maeso. Outros elementos que escasean e que son moi necesarios para a fabricación destes aparellos son as terras raras. De feito, os portátiles, e practicamente todos os dispositivos electrónicos, son máis lixeiros grazas a elas. Nos ordenadores estas teñen un papel fundamental na pantalla. «Por exemplo, o europio e o terbio son activadores de fósforo, elementos que permiten que este poida emitir luz xerando unha imaxe máis nítida e con máis cores». En canto ao galio, «é un metal curioso porque se funde na man coa temperatura ambiente, pero os compostos que forma, como co arsénico, son bos condutores», remarca a experta.
Información elaborada en colaboración coa Cámara Mineira de Galicia.
