M. Varela
Aínda queda tempo para apuntarse no concurso que fai dos estudantes de secundaria auténticos reporteiros: Xornalismo na Escola. Organizado por La Voz de Galicia e a empresa de enerxías renovables Norvento, este certame pretende que os alumnos comprendan a dificultade que ten contar novas de xeito rigoroso, e así estaren máis protexidos das novas falsas que circulan pola Rede.
O concurso está pensado para os profesores, xa que eles son quen teñen que anotarse, elixen con cantos rapaces queren traballar e ata poden decidir o tema. Poden contar coa colaboración doutros docentes, de feito iso é moi habitual.
Para anotarse, só teñen que enviar antes do día 22, cando cheguen as vacacións de Nadal, un correo electrónico á dirección do concurso (periodismoenlaescuela@prensaescuela.es) indicando o seu nome, centro, materia que imparte e curso que participará. Pode elixir calquera temática, aínda que se lle interesan as enerxías renovables (por exemplo, a súa importancia para Galicia, como poden fixar poboación no medio rural, as novas tendencias de autoconsumo ou as microrredes de almacenamento, entre outras cousas) pode optar a un premio propio, o de Norvento.
A publicación das reportaxes será na web de Prensa-Escuela (prensaescuela.es) e nestas páxinas falarán os profesores explicando como fixeron o traballo.
Un xurado analizará as reportaxes e decidirá quen gaña, aínda que tamén haberá un premio á noticia con máis votos do público na Rede.
As publicacións comezarán o 26 de xaneiro, á volta das vacacións, pero, antes de chegar a ver o traballo rematado, os docentes contarán con toda a axuda que precisen, dende efemérides que lles sirvan de inspiración a visitas de xornalistas ou para atopar as persoas máis expertas en cada materia.

 

Para anotarse hai que mandar un correo a periodismoenlaescuela@prensaescuela.es antes do día 22.

OS PREMIOS

  1. Galicia. Á mellor reportaxe segundo decida un xurado. O traballo publicarase nas páxinas xerais de La Voz, cunha audiencia potencial de 320.000 persoas, e haberá tamén unha entrevista ao profesor responsable. Este recibirá como agasallo un patinete eléctrico e os rapaces irán a un parque temático da comunidade.
  2. Norvento. Será para a mellor reportaxe sobre enerxías renovables. O traballo sairá nas páxinas xerais de La Voz e os alumnos poderán coñecer o Centro de Innovación Norvento Enerxía (CIne) e tamén irán a un parque temático en Galicia. O docente recibirá unha bicicleta eléctrica.
  3. Provinciais. Nesta categoría premiarase unha reportaxe por provincia que sairá publicada nas edicións desa área concreta.
  4. Votación. A reportaxe con máis votos na web suporá unha viaxe a un parque temático de Galicia para os alumnos e un patinete eléctrico para o docente.
Compartir en Compartir en Facebook Compartir en Twitter Compartir en WhatsApp

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies