S. PÉREZ

Coa historia de Martín Varela (Ferrol, 1996), a crenza de que a mellor elección sempre será aquela pola que sintas paixón adquire todo o sentido. El di que grazas á liberdade que tivo á hora de escoller o que estudar, a súa etapa na universidade converteuse en algo así como un templo onde aprender era case un xogo.

—Tiñas clara a aposta pola Historia da Arte?

—A miña decisión foi no último momento. Non tiven a materia de Historia da Arte ata segundo de bacharelato, e aí descubrín un mundo que me encantaba. Eu sabía que algo de humanidades ía ser, pero tiven dúbidas. Tomei a decisión baseándome no que máis me gustaba, non pensando no que ía traballar despois. Con perspectiva, iso é o que me parece máis valioso. Afortunadamente, non me vin forzado máis alá da miña propia liberdade. Que case fose un xogo aprender. Foi imprescindible o apoio na casa e a motivación do profesorado.

—Remataches traballando no mundo da cultura logo de estudar Historia da Arte.

—O meu perfil é bastante raro. Dende pequeno levo dedicándome ao mundo da maxia. De forma paralela aos estudos regrados fun desenvolvendo o meu propio camiño dentro da maxia. Antes de rematar a carreira empecei a colaborar coa compañía Thinking Up Events, e no ano 2018 organizamos o festival de maxia de Ferrol. Fun moi afortunado, pois ao rematar de estudar xa comecei a traballar con eles como xestor cultural. De xeito paralelo, fun facer un mestrado de xestión cultural a Madrid.

—Un día de traballo normal como é?

—Non hai días normais, de rutina. A min é unha das cousas que máis me gustan deste traballo. Cada proxecto que facemos é diferente. Traballo no festival de ilusionismo e combino unha parte de xestión e de dirección artística coa parte operativa de produción. O mundo das artes escénicas é multidisciplinar. Por exemplo, dependendo dun caso ou doutro, podo seleccionar os artistas, deseñar a programación ou establecer obxectivos. Cando organizamos o concerto no Monte do Gozo de Alejandro Sanz centreime na xestión operativa, no campo da produción e organización do traballo. Sempre con esa sensibilidade do mundo cultural.

—O horario é sempre o mesmo?

—Si, sempre é o mesmo horario. Cando a carga de traballo é maior, compensámolo despois dalgún xeito. Teño bastante liberdade, algo que eu persoalmente agradezo.

—É o teu posto soñado?

—Non sei cando me cansarei, chegará un momento no que a enerxía se me esgote. Agora mesmo este posto adáptase ás miñas inquedanzas, son unha persoa que intenta vivir de forma creativa profesionalmente. Non ter unha orde fixa do traballo motívame a pensar dun xeito diferente.

—A inserción laboral…

—É un problema. Parte dos meus compañeiros de carreira están no mundo da investigación, dos museos e outros non están vinculados á historia. O que si que é certo e que non atopo xente que se arrepinta de estudar esta carreira.

—Que é o mellor do teu traballo?

—O que máis valoro é que a miña voz se escoita, que as miñas ideas teñen sentido. Apostaron por min cando a única experiencia que tiña era a que acadara con eles nas primeiras colaboracións.

—E o peor?

—O que menos é o papeleo. Non esperaba ter que dedicarlle tanto tempo á burocracia. De todos os xeitos, entendo que é algo necesario.

—Hai algún consello que che gustaría que che desen?

—A min déronmo. É moi fácil dicilo no aire pensando que todo depende de nós mesmos… Se podemos facer o que queremos, o que nos gusta… Ese é o mellor consello que me deron. Escoitarme a min mesmo e tirar por aí.

PERFIL QUE SE BUSCA PARA UN POSTO ASÍ

Sensibilidade, memoria e curiosidade intelectual

Dedicarse á xestión cultural esixe unha serie de coñecementos e habilidades que se poden ir preparando con tempo de estudo e actividades axeitadas.

Coñecementos previos

Boa capacidade lectora e redactora.

Dominio do inglés e certa facilidade para comprender linguas románicas como o francés ou o italiano (recomendado).

Coñecementos básicos de informática (recomendado).

Habilidades e aptitudes

Sensibilidade para ver, ler e interpretar as obras.

Boa capacidade de observación e para apreciar detalles e sutilezas.

Capacidade para a síntese e a redacción.

Boa memoria a curto e longo prazo.

Capacidade de interrelación.

Curiosidade intelectual para documentarse, saber utilizar as ferramentas e as técnicas necesarias e aprender novo vocabulario e coñecer culturas.

Boa capacidade analítica e crítica.

Capacidade de abstracción.

Capacidade de comunicación.

Intereses

Interese polo coñecemento artístico e práctica habitual de visitas a monumentos históricos, museos e exposicións de diferente índole.

Interese polo coñecemento de novas culturas.

 

Esta información foi elaborada polos expertos da asesoría educativa viaedu.es

Compartir en Compartir en Facebook Compartir en Twitter Compartir en WhatsApp

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies