VALOR CIDADÁN 4: COÑECEMENTO CIENTÍFICO / UNIDADE 3: COÑECEMENTO CIENTÍFICO, CERTEZA E DÚBIDA

INTRODUCIÓN

A ciencia non produce certezas: unha cousa son os feitos irrefutables (a Terra non é plana, senón aproximadamente esférica) e outra as teorías e os modelos científicos.

-«O problema do mundo é que os estúpidos están completamente seguros e os intelixentes cheos de dúbidas». Bertrand Russell

-«A auténtica ciencia ensina sobre todo a dubidar e a saberse ignorante». Miguel de Unamuno

-Wiliam Hamilton: «O cume máis alto da ciencia humana é o recoñecemento da ignorancia humana»

O valor da dúbida

Sobre os feitos podemos chegar a desenvolver certezas incuestionables, pero sobre a forma en que os explicamos, que é o que fai a ciencia, sempre debemos deixar unha porta aberta á dúbida.

John Archibald Wheeler, físico estadounidense que lle puxo nome aos buracos negros, adoitaba dicir que vivimos nunha illa rodeada dun océano de ignorancia, e que a medida que a nosa illa de coñecemento crece, tamén o fai á conta da nosa ignorancia. Referíase ao coñecido fenómeno de que canto máis sabemos sobre o mundo máis preguntas novas vannos xurdindo, o que nos obriga a recoñecer que a ciencia é como unha máquina de fabricar nova ignorancia. Wheeler, como todos os bos científicos, pasouse a vida loitando contra a sensación de certeza que con tanta facilidade nos invade aos humanos. Se non dubidásemos e non recoñecésemos a nosa ignorancia, nunca teriamos ideas novas.

O presente e-studo consta de 4 Unidades, que se editan separadamente na web. Para facilitar o traballo en clase pódese consultar tamén nun documento único, editado en word, nesta mesma Unidade.

1. A NOTICIA

Darwin e Galileo

No 2009 celebramos os 400 anos das primeiras observacións de Galileo co telescopio e os 150 anos da publicación de A orixe das especies, a obra na que Charles Darwin deu a coñecer a súa teoria da evolución. Os achados destes científicos deron lugar a auténticas revolucións: o primeiro, ao desaloxar á humanidade da súa posición privilexiada no centro do universo; e o segundo, ao converternos nunha máis das especies que poboan o planeta, froito ademais dun proceso de evolución incompatible coa crenza de que somos o froito escollido da creación.

Con todo, ambos se enfrontaban de forma completamente distinta ás súas propias dúbidas. O carácter orgulloso de Galileo levoulle a esixir que se adecuase o contido da Biblia ao modelo heliocéntrico do universo, aínda que entón non dispuña dunha proba irrefutable que demostrase que a Terra daba voltas ao redor do Sol. Pola contra, a prudencia de Darwin levoulle a esperar vinte anos antes de dar a coñecer a teoría da Evolución.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies