Até Santiago de Compostela chegan cada ano miles de peregrinos de todos os lugares do mundo. A ruta xacobea impresiona pola súa beleza. Pero tamén pola historia que a acompaña. E a partir de agora retámosvos a que coñezades os segredos que agocha o Camiño de Santiago. E queremos que o fagades dun xeito moi divertido e acompañados por un curioso personaxe: o lagarto Roi.
Esta mascota invita a todos os estudantes a coñecer mellor o Camiño de Santiago mediante un xogo con preguntas. En cada unha destas cuestións, atoparedes diferentes enlaces a contidos didácticos que vos axudarán a dar coa resposta correcta. Ademais, para ir ben preparado ao xogo, La Voz de la Escuela publicará cada semana contidos de apoio cos que poidades ir aprendendo todos os segredos e as historias do Camiño que despois vos permitirán responder os cuestionarios de xeito correcto e así gañar un premio.
O xogo ten dous niveis: o básico e o avanzado. Cada un dos participantes ten que acertar vinte preguntas do nivel que elixa para poder conseguir un premio virtual. E se fallades algunha das cuestións? Pois non pasará nada, porque poderedes volver atrás e intentalo de novo con cuestións diferentes que vos lanzará o xogo.
Atoparedes toda clase de preguntas referentes ao Camiño, como por exemplo cantos quilómetros hai que andar para conseguir un certificado de peregrino. Pero tamén faredes dun xeito moi divertido un repaso da historia que hai detrás, posto que, a través de diferentes preguntas, se percorrerán algunhas das curiosidades máis antigas da ruta xacobea. Sabiades que os peregrinos medievais levaban unha cabaza na cabeza? E sabiades por que o facían? A través dos textos que irá publicando La Voz de la Escuela e das preguntas poderedes ir descubrindo estas curiosidades. Cada unha das cuestións que incluirá o xogo presentará catro posibles opcións nas que só unha é a correcta. Todas as preguntas terán un enlace para complementar a información, polo que o traballo resultará realmente interesante non só para os máis pequenos, senón tamén para os profesores e para as familias.
Así poderás xogar
- Durante doce semanas, La Voz de la Escuela publicará un texto semanal con historias e datos sobre o Camiño. Teredes que ir lendo os textos para saber as respostas do test.
- Xunto cos textos, atoparedes un código QR para acceder as instrucións.
- A comezos de xuño, habilitarase a web cos test e poderedes xogar e gañar o premio.
Un lagarto que vos axudará a gañar un premio
Ao longo de esta aventura contaredes coa axuda dun pequeno lagarto. Roi será o voso compañeiro de viaxe e irá ensinándovos todo o que precisades para poder ir superando as probas deste particular concurso. O lagarto Roi será o mellor mestre de cerimonias. El vos invitará a coñecer mellor o Camiño de Santiago a través dun divertido xogo con preguntas sinxelas.
Ademais, Roi aparecerá a partir da semana que vén no interior das páxinas de La Voz de la Escuela. Teredes que atopalo. El será o encargado de darvos as primeiras pistas para que poidades superar con éxito o test. Porque nas páxinas nas que apareza o lagarto Roi atoparedes algunhas das chaves do Camiño e poderedes ler as historias máis curiosas da ruta xacobea. Neses textos teredes as respostas que vos axudarán a superar despois con éxito os cuestionarios que se habilitarán a partir do mes de xuño. E para os que consigades superar o reto, haberá recompensa. Porque en calquera dos niveis, todos aqueles alumnos que sexades capaces de responder as vinte preguntas, obteredes un premio. Que será? Pois poderedes ler o xornal do día que nacestes.
Unha vez superada a proba correctamente, escolleredes a vosa data de nacemento e, tras facilitar un correo electrónico e a edición que máis preto se atope da vosa casa, o sistema enviará de xeito automático este interesante agasallo ao voso correo.
