O Colexio de Educadoras e Educadores Sociais de Galicia (Ceesg) considera que a opción da Consellería de Educación de facer de profesores os coordinadores de benestar nos centros é unha «saía rápida» para cumprir coa lei que regula esta figura pero «non achegará solucións reais ás problemáticas que atopamos nos centros educativos».
No seu comunicado, o Ceesg explica que «Educación non investirá na incorporación de persoal coordinador de benestar nos centros galegos. Así se pode concluír da orde publicada no DOG o xoves 30 de agosto, que establece esta figura (creada ao abeiro da Lei de Protección á Infancia) A solución da Xunta consiste en que sexa o profesorado xa existente o que asuma estas funcións».
Por iso, parécelles «preocupante que esta medida non garanta ningunha formación específica para asumir esas funcións, tendo en conta que é un posto no que a formación en intervención socioeducativa con infancia e adolescentes é fundamental para un bo desenvolvemento das súas funcións».
Fronte a esta decisión, a proposta do Ceesg, que foi trasladada á Consellería xa antes de que se comezase a tramitar a norma, é «a incorporación de profesionais da educación social, evitando a sobrecarga de funcións do profesorado, e asegurando ademais a especialización e capacitación das/os profesionais que exerzan como coordinadoras/es de benestar e convivencia». «Precísase —engade o colexio profesional— unha estratexia clara para a prevención das situacións de acoso escolar e vulnerabilidade relacionada coa saúde mental das crianzas galegas», no que hai que «apostar por servizos de calidade, e non por parches que reforcen a sobrecarga do profesorado, e, polo tanto, do sistema».
