SARA CARREIRA
O curso está chegando ao seu fin, e en La Voz de la Escuela tamén terminou o proceso dos seus concursos, que dentro duns días terán gañadores.
Xornalismo na Escola
Hoxe publícanse as tres últimas reportaxes de Xornalismo na Escola desta edición. Foron 21 traballos nos que alumnos de ESO e bacharelato convertéronse en reporteiros para facer un traballo xornalístico. As primeiras publicacións foron a finais de xaneiro, ca reportaxe do CPR Torre de Lemos, de Monforte, sobre a presenza do tren na historia e desenvolvemento da vila.
O premio, organizado con Norvento, ten dúas modalidades: unha xeral e outra, a de Norvento, sobre as enerxías renovables e o autoconsumo. O xurado analizará os traballos valorando a súa creatividade e orixinalidade, interese e, por suposto, a calidade dos textos, as fontes consultadas e a responsabilidade dos escritos; na categoría Norvento terase en conta a concienciación sobre as enerxías renovables e a protección do medio ambiente.
O xurado reunirase o vindeiro venres na sede de La Voz de Galicia para elixir aos gañadores. Forman este xurado Rafael Sanguino, director de Márketing e Vendas de La Voz de Galicia e responsable técnico de La Voz de la Escuela; as xornalistas María del Carmen González (subdirectora de La Voz de Galicia) e Sara Carreira (coordinadora de La Voz de la Escuela); Manel Yáñez Dablanca, profesor de Filosofía no IES Dionisio Gamallo, de Ribadeo; e María Ruiz Martín, representante da empresa Norvento.
O grupo ten que elixir os gañadores dos sete premios que ten o certame:
■ Premio Norvento. Supón a publicación da reportaxe nas páxinas xerais do xornal, e os rapaces viaxarán a un parque temático de Galicia, ademais de visitar o Centro de Innovación Norvento Enerxía (CINE). O profesor responsable levará unha bicicleta eléctrica.
■ Premio Galicia. Na modalidade xenérica ten como premio Galicia a publicación da reportaxe nas páxinas xerais do xornal, unha entrevista ao docente e unha visita da clase a un parque temático galego; o profesor recibirá un patinete eléctrico.
■ Premios provinciais. A peza xornalística será reproducida nas páxinas locais das edicións de La Voz nesa provincia.
■ Premio Votación. Gañará a peza, non importa se da categoría xeral ou da de Norvento, que teña máis votos do público ás 0.00 horas do 4 de xuño (nas bases indícase que o período de votacións vai do 26 de xaneiro ao 3 de xuño). A consultora informática que atende a web de Prensa-Escuela será a que certifique o número de votos. O centro gañador levará unha viaxe para os rapaces a un parque temático galego, e o profesor, un patinete eléctrico.
Mellor Xornalista
O segundo certame que xa rematou é o de Mellor Xornalista Infantil e Xuvenil, organizado en colaboración con Viaqua, e que neste curso chegou á súa 18.ª edición cuns 2.000 participantes. Nel, os rapaces fan un achegamento ao xornalismo de xeito individual. Segundo a idade, o traballo pode ser o debuxo inspirado nunha noticia (ata 2.º de primaria, incluído); o debuxo máis un resumo da nova (de 3.º a 6.º de primaria); unha entrevista, coa súa foto e o perfil do entrevistado (para alumnos da ESO); ou un artigo de opinión (para bacharelato).
O xurado reunirase o xoves 2 de xuño na sede de La Voz de Galicia para elixir os gañadores. Forman este xurado Rafael Sanguino, director de Márketing e Vendas de La Voz de Galicia; os xornalistas de La Voz de Galicia César Casal (subdirector), Sofía Vázquez (xefa de área de Opinión e Organización), Sandra Faginas (xefa de Suplementos) e Ana Abelenda (coordinadora do suplemento cultural Fugas); tamén estará Carlos Ocampo, editor de La Voz de la Escuela, e Sonia Delpont, directora de Comunicación e Márketing de Viaqua.
Neste caso o concurso tivo tamén dúas modalidades: a xeral e a de Viaqua, que engloba os traballos de temática medioambiental. Os premios serán:
■ Categoría Viaqua. O gañador de cada unha das dúas modalidade infantís recibirá unha cámara de fotos dixital; o segundo clasificado, un lector de e-books.
En cada unha das modalidades xuvenís, o gañador vivirá a experiencia de ser xornalista por un día compartindo o traballo na redacción de La Voz, e uns cascos sen fíos; o segundo clasificado vivirá a experiencia de ser xornalista por un día, o xeito de celebrar os 40 anos de La Voz de la Escuela. Ademais, ambos poderán gozar dunha visita ás instalacións de Viaqua máis próximas á súa casa para coñecer o ciclo urbano da auga.
Os profesores responsables dos traballos gañadores dos primeiros premios de cada modalidade recibirán como agasallo un libro electrónico.
■ Categoría xeral. Os gañadores de cada unha das dúas modalidade infantís recibirán unha cámara de fotos dixital, e o segundo clasificado, un reprodutor MP4.
Nas dúas modalidades xuvenís o gañador do primeiro premio vivirá a experiencia de ser xornalista por un día, compartindo o traballo na redacción de La Voz, e uns cascos sen fíos; o segundo clasificado vivirá a mesma experiencia de ser xornalista por un día.
Os profesores responsables dos traballos gañadores dos primeiros premios de cada modalidade recibirán como agasallo un libro electrónico.
Entrega de premios
O acto de entrega de premios está previsto para o venres 17 de xuño no Museo Santiago Rey Fernández-Latorre, que está no recinto de La Voz de Galicia no polígono de Sabón, en Arteixo. Os gañadores do premio Norvento do certame Xornalismo na Escola recibirán o seu premio no propio CINE, o centro de Lugo.
Ao Museo de La Voz estarán convocados só os gañadores, e recibirán os agasallos de man dos responsables de La Voz de Galicia e autoridades, que se darán cita para a ocasión. Despois terá lugar un encontro informal.
Será a primeira entrega de premios de Xornalismo na Escola, que tivo un programa piloto no curso 2019-20 que por culpa da pandemia se ampliou ao curso pasado; nesa ocasión non houbo ningunha cerimonia aínda que si se publicaron as reportaxes gañadoras das dúas fases do concurso.
