OLGA SUÁREZ
O Erasmus + é un programa da UE que facilita que alumnos e profesores poidan entrar en contacto con xente doutros centros educativos dalgún país comunitario. Unha das ferramentas coas que contan os participantes chámase a plataforma etwinning, que permite a toma de contacto para facer un traballo por proxectos en común. Foi alá onde lanzou o seu mensaxe Fernando Rodríguez, profesor do CPR Fillas de María Inmaculada de Vigo, e contestoulle Andreas Gaul, profesor do instituto alemán Max-Eyth-Schule Dreieich, de Fráncfort. Dese primeiro contacto naceu o proxecto The power of triangle.
Os dous profesores comezaron a traballar en común e involucraron a un grupo de estudantes. Ademais, outro colexio vigués uniuse á iniciativa, o Colexio Fogar Afundación.
Alumnos de FP de grao medio
Os alumnos mostraron moito interese e grazas a este alto índice de participación, viuse a posibilidade de viaxar a Fráncfort cun grupo formado por dous docentes do centro, Alejandra Martínez e Fernando Rodríguez, dous alumnos e tres alumnas do ciclo formativo do grao medio de Actividades Comerciais. «Desa visita a Alemaña, trouxemos unha moi boa impresión e unhas enormes ganas de seguir traballando», recorda Fernando Rodríguez.
O pasado 9 de outubro visitou Galicia o grupo alemán, formado polos docentes Susanne Frey e Andreas Gaul, tres alumnas e trece alumnos. «Foron dez días intensos cheos de actividades, con diversos obradoiros, a construción de dous domos xeodésicos, participando xuntos en excursións ás Illas Cíes, Santiago e un estaleiro en Marín». O grupo alemán foi acompañado en todo momento por alumnos españois
O nome do proxecto fai homenaxe aos domo xeodésicos, feitos a base de triángulos en no que colaboraron estas tres escolas. «Estes proxectos, sostidos con fondos de Erasmus+, son unha grande oportunidade para estar en contacto con alumnado e docentes doutros centros europeos, compartir moitas experiencias con eles, aprender uns de outros, vivir na diversidade, enriquecerse de novas culturas, perfeccionar un idioma e en definitiva, converternos en cidadáns do mundo, coñecendo unha Europa plural e diversa, abrindo as mentes do noso alumnado e motivándoos na aprendizaxe das linguas estranxeiras», resume o profesor vigués. E no ten dúbida de que repetirán a experiencia en vindeiros cursos.
