ANA T. JACK

Antes da irrupción do covid-19 nas nosas vidas, e nas dos nosos fillos, a taxa de exceso de peso estimada na poboación infantil española xa estaba en torno ao 41 %. Tras case un ano de restricións de mobilidade, confinamento domiciliario, diminución da práctica deportiva, aumento do uso de pantallas de todo tipo e coa mesma inxestión de calorías (se non máis, coa posta en práctica de todo tipo de receitas creativas de cociña para matar o tempo libre que tiñamos por culpa do forzado e intermitente illamento social), o resultado da fórmula non pode ser bo.

De feito, unha recente investigación realizada por Qustodio, plataforma de seguridade e benestar dixital para familias, sobre Centennials: el antes y el después de una generación marcada por el covid-19 revela que para sete de cada dez familias os hábitos de consumo e a actividade física dos fillos é unha das maiores preocupacións actuais. Por certo, con centennials ou xeración Z alúdese aos nados en torno ao ano 2000, que toman a vez dos millennials como xeración dixital máis experta e que creceu rodeada de dispositivos electrónicos e plataformas virtuais. Segundo o devandito estudo:

O 30 % dos nenos e adolescentes actuais non pasan ao aire libre nin sequera a hora mínima diaria recomendada polos especialistas en saúde, unha porcentaxe que alcanza o 40 % no caso de grandes cidades como Madrid.
O 70 % dos menores pasan agora máis tempo conectados a Internet que antes da pandemia.

O 33 % de fogares españois adquiriron un novo dispositivo dixital no último ano.

O 60 % das familias aseguran que a pandemia provocou que os seus fillos desenvolvan adicción ás pantallas.

O 70 % dos xoves practican menos actividade física a pesar de que manteñen o mesmo nivel de consumo de alimentos.

Uns datos sen dúbida preocupantes para a saúde física e psicolóxica das xeracións máis novas se non conseguimos pór freo a esta perigosa deriva cara ao sedentarismo: unha secuela que afecta en maior medida ás mulleres e ás familias con menos recursos económicos e sociais.

Que tal se empezamos por duplicar as horas de Educación Física nos centros educativos? Os seus beneficios serían evidentes a medio e longo prazo.

 

Cambia os teus hábitos para mellorar en calidade de vida

A epidemia de obesidade infantil é, pois, xa unha realidade que afecta a un de cada tres nenos españois. E tres de cada catro adolescentes son sedentarios. É dicir, non fan o exercicio físico mínimo necesario para coidar a saúde, que se estima nunha hora diaria segundo, os estándares que establece a Organización Mundial da Saúde (OMS). Esta entidade considera que son dez as tendencias sociais que explican a denominada contorna obesoxénica na que se desenvolven os cidadáns do século XXI, e que no último ano víronse acentuadas por mor das restricións de mobilidade:

O aumento do lecer sedentario: actividades entre catro paredes, con moito tempo diante dos videoxogos, Internet, televisión, plataformas de streaming…

As estratexias publicitarias especialmente dirixidas aos menores a través de anuncios, debuxos animados, advergaming (aplicacións e videoxogos para publicitar unha marca de alimentos pouco nutritivos, por exemplo).

A escasa actividade física nas escolas (dúas horas á semana resultan insuficientes, sobre todo para aqueles que non poden asistir a actividades deportivas extraescolares).

 O incremento do uso de vehículos á hora de realizar calquera desprazamento.

 A cantidade e variedade de alimentos dispoñibles cun alto contido calórico: pastelaría industrial, lambeiradas, comida lixo, que podemos encontrar nos súper ou pedila nun clic.

 O maior tamaño das racións en pizzerías, hamburgueserías… e o recheo de bebidas gratuíto en determinados restaurantes de comida rápida.

 O consumo de refrescos azucrados en substitución da auga.

 A omisión do almorzo, que logo é substituído normalmente a media mañá por alimentos hipercalóricos.

 As máquinas de venda con produtos pouco nutritivos (en escolas, lugares de traballo…) e tendas de lambetadas na proximidade dos centros educativos.

 A redución de oportunidades para realizar actividade física no tempo de lecer: poucas zonas verdes, espazos reducidos e, no último ano, dificultades para practicar actividades deportivas e ao aire libre.

Pero non todo está perdido. A solución para alcanzar uns hábitos saudables consiste, sinxelamente, en inverter estas dez tendencias. A nosa saúde, e a das seguintes xeracións, está en xogo.

anatjack@edu.xunta.es

Tema do mes. As outras consecuencias do covid-19

Etapa. Infantil, primaria e secundaria

O dato. España é o cuarto país de Europa con máis incidencia de obesidade infantil, só por detrás de Grecia, Malta e Italia (Estudo Pasos, Fundación Gasol, 2019)

A frase. «Enfrontamos o sedentarismo con cintas de camiñar, o insomnio con pastillas, a soidade con electrónica» (José Mujica)

Erros a evitar. Ofrecer de forma habitual aos menores alimentos pouco nutritivos e con alto contido calórico xustificándoo cun «os nenos quéimano todo».

Algunhas claves. Establecer hábitos saudables en relación coa dieta e o exercicio físico e ofrecer bo exemplo

Para saber más. Malnutrición, obesidad infantil y derechos de la infancia en España (guía de Unicef, 2019) 

Compartir en Compartir en Facebook Compartir en Twitter Compartir en WhatsApp

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies