Á esquerda, o anoa, especie de búfalo pequeno típico das illas Célebes, protagoniza unha das pinturas. Á dereita, o equipo científico, accedendo á cova Leang Bulu’ Sipong 4 | RATNO SARDI / GRIFFITH UNIVERSITY

LA VOZ | LONDRES / EFE | 12/12/2019

Un equipo de arqueólogos da Universidade de Griffith (Australia) descubriu nunha cova en Indonesia a escena de caza máis antiga do mundo coñecida ata o momento nunha obra de arte rupestre de polo menos 44.000 anos de antigüidade. A investigación, publicada este mércores na revista Nature, describe a pintura atopada na illa de Célebes como un grupo de figuras abstractas que combinan características humanas con outras animais, coñecidas como «teriántropos», que cazan grandes mamíferos con lanzas e cordas.

A representación dos cazadores a través destas figuras antropomórficas, aseguran os expertos, pode ser ademais a proba máis antiga da habilidade da nosa especie para imaxinar «a existencia de seres supernaturais, a pedra angular da experiencia relixiosa». Ata o de agora, as imaxes recoñecibles máis antigas de humanos e animais interactuando correspondían á arte rupestre descuberta en Europa proveniente do Paleolítico Superior, cunha antigüidade de entre 14.000 e 21.000 anos.

O equipo, liderado polos arqueólogos Maxime Aubert e Adam Brumm, achou estas representacións na cova Leang Bulu’ Sipong 4, descuberta en 2017 nunha rexión kárstica de pedra calcaria en Célebes.

Actividades

1. Noticia completa: Na páxina 41 de La Voz de Galicia, sección Cultura.

2. Viaxe xeográfica. A vantaxe destas noticias é que, ademais do seu interese científico, proporciónannos gratis unha boa viaxe por sitios e nacións talvez inexploradas para a maioría de nós: Isla de Célebes, Australia, Indonesia… ¿Imaxínasche?

3. Viaxe temporal: Paleolítico Superior… ¿Pescudamos cando foi? Proporciónannos dous datos: 14.000 / 21.000 anos. Pois xa había cazadores. ¿Imaxínasche un día de caza naqueles tempos? ¿Temos en España algunha cova famosa que nos debuxa tamén aqueles momentos? ¿É máis ou menos antiga que relatan estes descubridores?

4. A vida humana. É a clave da investigación. ¿Como lograron vivir e en que circunstancias conseguiron sobrevivir? ¿Imaxínasche naquela época? Que pensas da vida humana sobre a Terra a pesar de tanta dureza?