JESÚS GARRIDO
Cubos e murais de exposición, claro. E, normalmente, de cartón forte ou madeira fina. Aparecen de súpeto nas rúas e prazas de cidades e vilas e, por suposto, en salóns interiores. Conteñen información breve, letra grande, fotos, signos. Mantéñense un tempo, discreto e suficiente. E marchan, sen deixar rastro na rúa nin nas salas interiores, pero co orgullo de ter cumprida a misión de informar a todos os que se moven por alí.
Os cubos, pola súa base de cadrado ancha, son máis resistentes, mesmo ao vento, e ofrecen información a catro caras. En cambio, os chamados murais prefiren o interior das salas. Son verticalmente máis alongados e ocupan ao ancho menos espazo. Mentres se manteñen en pé, os paseantes rectilíneos creban o seu ritmo de marcha, pairan, miran e, aos poucos, enróscanse ao redor das súas figuras, len, toman fotos, piden desculpas a outros visitantes cos que se entrecruzan. E, con frecuencia, cando marchan, volven e apuntan ou recollen en foto algo que non queren esquecer.
Ultimamente na Coruña houbo a mostra de dous expocubos:
1 | Unha, moi abundante, dedicada á historia de La Voz de Galicia, que fixo 140 anos. Nela inclúese tamén a historia de La Voz de la Escuela. Podes ver un resumo na web de La Voz.
■ Exposición A historia de La Voz de Galicia. 140 anos: t.ly/dSk4
2 | E a outra expocubos estivo na avenida do Porto da Coruña. O asunto era a escritora Emilia Pardo Bazán. Resaltamos, sobre todo, a xenialidade desta muller. Palabras claves: muller, educación, emoción, instrución, catedrática, escolar, libros, coñecementos, maxisterio, lecturas, Coruña, España… e primeira: foi a primeira muller conselleira do Maxisterio de Instrución Pública.
■ 1910: «Desde aquela ás mulleres permíteselles traballar na área de Educación».
■ 1916: Primeira muller catedrática de España: «Lingua Neolatina, a materia que coñezo e podo ensinar».
■ «Vendo o mal fundado da miña instrución, a miña erudición á violeta e a desorde das miñas lecturas, púxenme ao traballo de enlazalas, enchendo os ocos dos meus coñecementos… e gradualos a modo dun canteiro que tapa ocos na parede».
■ «Nada é tan necesario e tan fecundo como a emoción».
■ Organiza na Coruña a primeira colonia escolar mixta de España.
■ «No vasto caserón, severo e silencioso da Coruña, descubrín un tesouro: un niño de libros, que roldei… ata que mo deixaron á miña disposición».
PARA SABER MÁIS
1 | Visita virtual á exposición sobre A Marineda de Emilia Pardo Bazán.
2 | Sabes facer un cubo de papel… pequeno? Pois iso: dálle dimensión (ao pequeno e ao grande, se podes) e enche de información a túa clase, o corredor ou os patios de recreo ao are libre.
