SARA CARREIRA
O pasado sábado, A Coruña acolleu unha actividade que volve a ser despois da pandemia: a Feira Matemática, organizada por Agapema, que é a asociación galega de profesores de matemáticas. A feira naceu hai anos cando un profesor do IES Eusebio da Guarda coruñés e do CFR local, o falecido Manuel Pazos Crespo, Coque, animara aos seus compañeiros a facer algo como na feira de Paiosaco, onde cada agricultor leva os seus excedentes. Neste caso, ao falar das matemáticas, o que propoñía era que cada profesor ou equipo levara a unha feira o que fai na clase de matemáticas, no canto de pagar a cada rapaz que xogue cos seus inventos e non cobrar por deixalo gozar deles.
Dende entón, a feira fai iso: colexios e institutos poñen unha mesa no Palexco coruñés e nela expoñen xogos e actividades diferentes, e profesores e alumnos atenden o posto. Os rapaces pasan por alí, preguntan e xogan co que queren e reciben a moeda de curso legal na feira, o agapemo; cando xuntan varios poden comprar libros, xogos ou mesmo figuras de papiroflexia.
Iso foi o que aconteceu o sábado, onde Enrique de la Torre, un dos organizadores, recoñecía que «nótase aínda a pandemia». De feito, na categoría de CEIP só estivo un centro, o Barrié de la Maza, de Sada, con tres postos —atendidos por Patricia, Raquel e Iria, profesoras de primeiro, terceiro e cuarto— con gran éxito de público porque, como dicía Iria, levaron «los juegos que sabemos que gustan».
Na feira houbo moita xeometría, puzles e montaxes. E xogos de lóxica, especialmente nos postos dos institutos de secundaria ou no de Crecer Creando, a tenda obradoiro de Ana Rodríguez, que é unha referencia nas matemáticas educativas de toda Galicia.
Así pasou o día en Palexco, con paseo de familias, grupos de rapaces adolescentes, mentres alumnos e profesores de centros de Baio, Ordes ou A Coruña traballaban xunto cos postos da Garda Civil (o organismo leva unha moto moi apreciada), o colexio de médicos (o seu maniquí para RCP tivo liña de espera), a universidade coruñesa, o INE (e os seus gráficos), o programa de matemáticas da USC Estalmat ou a asociación Atlantis.
Día da Ciencia na Rúa
A seguinte cita STEM será este sábado no parque coruñés de Santa Margarida: o Día da Ciencia na Rúa.
