A noticia do día

Venres, 14 Decembro 2018

«As beirarrúas son para os peóns»

O fiscal de seguridade viaria ordena ás policías locais que investiguen penalmente os atropelos causados por patinetes e advirte que eses vehículos «non son xoguetes»

O fiscal coordinador de Seguridade Viaria da Fiscalía Xeral do Estado, Bartolomeu  Vargas, alerta dos perigos que provoca o mal uso dos patinetes eléctricos, cuxa proliferación nas cidades está a causar problemas de convivencia co resto dos usuarios das rúas, en especial os peóns, que están a ser os grandes prexudicados pola irrupción dos VMP (vehículos de mobilidade persoal)

O fiscal  Vargas quere deixar clara unha cousa: «As beirarrúas son para os peóns, que son quen máis dereitos teñen nas cidades». Por iso reclama un maior respecto cara a eles por parte dos condutores de patinetes e de bicicletas cando circulen polas zonas peonís. Recoñece o fiscal que o patinete eléctrico é un instrumento moi positivo para a mobilidade nas grandes cidades, pero cre que hai que ter claro que «o patinete non é un xoguete» e que, por tanto, os usuarios deben respectar as normas de circulación.

En caso de atropelos. O fiscal advirte que os patinadores, tamén os ciclistas que circulen a velocidade excesiva e sen cumprir os requisitos mínimos poden expoñerse a sancións penais cando causen accidentes, como autores de delitos de lesións graves ou mesmo de homicidios imprudentes, que están castigados con penas de entre un e catro anos de cárcere. Por ese motivo, o fiscal enviou a todas as policías locais de España indicacións expresas sobre como deben actuar á hora de esixir responsabilidades penais no ámbito urbano aos condutores de patinetes que incumpran as normas.

Nota importante: Se picas no título da noticia, abriránseche as ligazóns do Quen, Que e Onde, ademais da proposta de Actividades.